kaun si ja hai jahan husn ka shohra na hua

kaun sī jā hai jahāñ husn kā shohrā na huā

ishq bechāra kahāñ dahr meñ rusvā na huā

ishq dariyā hai koī jis kā kinārā na huā

nāḳhudā koī nahīñ koī safīna na huā

kaise ehsās ho mahrūmī-e-qismat kā use

lazzat-e-dard se jo dil se shanāsā na huā

haath uThā.e jo duā ko to tujhe hī māñgā

ye to allāh se saudā huā sajda na huā

kyoñ na anjām-e-tamannā se sañvar jaa.e dil

ishq kī raah meñ kab ḳhūn-e-tamannā na huā

ek vo haiñ jo terī yaad meñ ro lete haiñ

ham ko ashkoñ kā bhī is ġham meñ sahārā na huā

be-ruḳhī kā hai gilā kyoñ tujhe dilbar se 'habīb'

pyaar karne kā tujhe ḳhud hī salīqa na huā

kaun si ja hai jahan husn ka shohra na hua

ishq bechaara kahan dahr mein ruswa na hua

ishq dariya hai koi jis ka kinara na hua

naKHuda koi nahin koi safina na hua

kaise ehsas ho mahrumi-e-qismat ka use

lazzat-e-dard se jo dil se shanasa na hua

hath uThae jo dua ko to tujhe hi manga

ye to allah se sauda hua sajda na hua

kyon na anjam-e-tamanna se sanwar jae dil

ishq ki rah mein kab KHun-e-tamanna na hua

ek wo hain jo teri yaad mein ro lete hain

hum ko ashkon ka bhi is gham mein sahaara na hua

be-ruKHi ka hai gila kyon tujhe dilbar se 'habib'

pyar karne ka tujhe KHud hi saliqa na hua