kaun sulagte aansu roke aag ke TukDe kaun chabae

kaun sulagte aañsū roke aag ke TukḌe kaun chabā.e

ai ham ko samjhāne vaale koī tujhe kyuuñ kar samjhā.e

jīvan ke andhiyāre path par jis ne terā saath diyā thā

dekh kahīñ vo komal aashā aañsū ban kar TuuT na jaa.e

is duniyā ke rahne vaale apnā apnā ġham khāte haiñ

kaun parāyā rog ḳharīde kaun parāyā dukh apnā.e

haa.e mirī māyūs ummīdeñ vaa.e mire nākām irāde

marne kī tadbīr na sūjhī jiine ke andāz na aa.e

is duniyā ke ġham-ḳhāne meñ ġham se itnī fursat kab hai

kaun sitāroñ kā muñh chūme kaun bahāroñ meñ lahrā.e

zabt bhī kab tak ho saktā hai sabr kī bhī ik had hotī hai

pal bhar chain na paane vaalā kab tak apnā rog chhupā.e

'shād' vahī āvāra shā.er jis ne tujh se pyaar kiyā thā

shahroñ shahroñ ghuum rahā hai armānoñ kī laash uThā.e

kaun sulagte aansu roke aag ke TukDe kaun chabae

ai hum ko samjhane wale koi tujhe kyun kar samjhae

jiwan ke andhiyare path par jis ne tera sath diya tha

dekh kahin wo komal aasha aansu ban kar TuT na jae

is duniya ke rahne wale apna apna gham khate hain

kaun paraya rog KHaride kaun paraya dukh apnae

hae meri mayus ummiden wae mere nakaam irade

marne ki tadbir na sujhi jine ke andaz na aae

is duniya ke gham-KHane mein gham se itni fursat kab hai

kaun sitaron ka munh chume kaun bahaaron mein lahrae

zabt bhi kab tak ho sakta hai sabr ki bhi ek had hoti hai

pal bhar chain na pane wala kab tak apna rog chhupae

'shad' wahi aawara shaer jis ne tujh se pyar kiya tha

shahron shahron ghum raha hai armanon ki lash uThae