kaun ye aag liye roz yahan aata hai

kaun ye aag liye roz yahāñ aatā hai

saañs letā huuñ to andar se dhuāñ aatā hai

ham ne to pyaas bujhānī hai faqat ashkoñ se

dasht-e-hijrāñ se kahāñ āb-e-ravāñ aatā hai

ye bhī kaafī hai ki vo yaad to kartā hai mujhe

koī milne ko bhalā roz kahāñ aatā hai

hijr ik aisā ilāqa hai ki jis se aage

girya-e-dil ke liye shahr-e-ziyāñ aatā hai

maiñ tire jaane se nārāz nahīñ huuñ ai dost

peḌ jhaḌ jaate haiñ jab daur-e-ḳhizāñ aatā hai

kaun sī raah pe tū chhoḌ gayā hai mujh ko

ḳhatm hotā hai safar aur na makāñ aatā hai

is jagah kaise koī ḳhvāb-e-mohabbat dekhe

raat ke vaqt jahāñ shor-e-sagāñ aatā hai

ye zamīñ is liye ābād hai 'ḳhālid-sajjād'

ek dar hai ki jahāñ saarā jahāñ aatā hai

kaun ye aag liye roz yahan aata hai

sans leta hun to andar se dhuan aata hai

hum ne to pyas bujhani hai faqat ashkon se

dasht-e-hijran se kahan aab-e-rawan aata hai

ye bhi kafi hai ki wo yaad to karta hai mujhe

koi milne ko bhala roz kahan aata hai

hijr ek aisa ilaqa hai ki jis se aage

girya-e-dil ke liye shahr-e-ziyan aata hai

main tere jaane se naraaz nahin hun ai dost

peD jhaD jate hain jab daur-e-KHizan aata hai

kaun si rah pe tu chhoD gaya hai mujh ko

KHatm hota hai safar aur na makan aata hai

is jagah kaise koi KHwab-e-mohabbat dekhe

raat ke waqt jahan shor-e-sagan aata hai

ye zamin is liye aabaad hai 'KHalid-sajjad'

ek dar hai ki jahan sara jahan aata hai