kaun ye raushni ko samjhae

kaun ye raushnī ko samjhā.e

saath dete nahīñ kabhī saa.e

raaz khul jaa.e phir vo raaz kahāñ

baat hī kyā jo lab pe aa jaa.e

ghar hamesha hī be-charāġh rahā

daaġh siine ke lau na de paa.e

chāñdnī khal rahī hai un kī tarah

guzre lamhāt kitne yaad aa.e

tire kūche meñ sub.h-dam aksar

dekh kar phuul ham ko sharmā.e

dhuup meñ mere saath chalte haiñ

un kī palkoñ ke dil-nashīñ saa.e

ham sukūñ kī talāsh meñ āḳhir

tere kūche meñ phir chale aa.e

roz jaatā huuñ mai-kade kī taraf

kaash ye dil kabhī bahal jaa.e

ab ḳharābāt meñ vo rind kahāñ

shab ga.e sub.h kī ḳhabar laa.e

bū-e-mai se mahak rahā hai dimāġh

bū-e-gul kī havas nikal jaa.e

mai-kada vaqt hī pe khultā hai

'vajd' be-vaqt kyuuñ chale aa.e

kaun ye raushni ko samjhae

sath dete nahin kabhi sae

raaz khul jae phir wo raaz kahan

baat hi kya jo lab pe aa jae

ghar hamesha hi be-charagh raha

dagh sine ke lau na de pae

chandni khal rahi hai un ki tarah

guzre lamhat kitne yaad aae

tere kuche mein subh-dam aksar

dekh kar phul hum ko sharmae

dhup mein mere sath chalte hain

un ki palkon ke dil-nashin sae

hum sukun ki talash mein aaKHir

tere kuche mein phir chale aae

roz jata hun mai-kade ki taraf

kash ye dil kabhi bahal jae

ab KHarabaat mein wo rind kahan

shab gae subh ki KHabar lae

bu-e-mai se mahak raha hai dimagh

bu-e-gul ki hawas nikal jae

mai-kada waqt hi pe khulta hai

'wajd' be-waqt kyun chale aae