kha lete hain ghusse mein talwar kaTari kya

khā lete haiñ ġhusse meñ talvār kaTārī kyā

ham log haiñ saudā.ī auqāt hamārī kyā

bijlī se lipaT kar ham bhasamañt hue āḳhir

us ko tire dāman kī samjhe the kanārī kyā

juuñ sham.a sar-e-shab se maiñ rone ko baiThā huuñ

tā āḳhir-e-shab dekhūñ dikhlā.e ye zaarī kyā

ghabrā.ī jo phirtī hai is taur sabā har-sū

aatī hai gulistāñ ko us gul kī savārī kyā

ronā mirī āñkhoñ se jab tak ki na sīkhegā

jā baiTh tū rovegā ai abar-e-bahārī kyā

sote se to uThne do Tuk us ko sahar hote

dekhoge ki machlegī vo chashm-e-ḳhumārī kyā

nargis kī ḳhajil āñkheñ itnī to na thiiñ gaahe

us chashm-e-mufattin se baazī koī haarī kyā

auqāt mujarrad kī kis tarah basar hove

jañgal hai ye biktī hai yaañ naan nahārī kyā

ai 'mus.hafī' maiñ us ko jī jaan se go chāhā

āḳhir ko huā hāsil juz-zillat-o-ḳhvārī kyā

kha lete hain ghusse mein talwar kaTari kya

hum log hain saudai auqat hamari kya

bijli se lipaT kar hum bhasamant hue aaKHir

us ko tere daman ki samjhe the kanari kya

jun shama sar-e-shab se main rone ko baiTha hun

ta aaKHir-e-shab dekhun dikhlae ye zari kya

ghabrai jo phirti hai is taur saba har-su

aati hai gulistan ko us gul ki sawari kya

rona meri aankhon se jab tak ki na sikhega

ja baiTh tu rowega ai abar-e-bahaari kya

sote se to uThne do Tuk us ko sahar hote

dekhoge ki machlegi wo chashm-e-KHumari kya

nargis ki KHajil aankhen itni to na thin gahe

us chashm-e-mufattin se bazi koi haari kya

auqat mujarrad ki kis tarah basar howe

jangal hai ye bikti hai yan nan nahaari kya

ai 'mushafi' main us ko ji jaan se go chaha

aaKHir ko hua hasil juz-zillat-o-KHwari kya