khai hai jo qasam wo hamein hai qasam aziz

khaa.ī hai jo qasam vo hameñ hai qasam 'azīz

'armān' kī qasam mujhe merā sanam 'azīz

rakkhe haiñ us ne ziist meñ jab se qadam 'azīz

us ke qadam 'azīz ḳhudā kī qasam 'azīz

hañsnā sisaknā rūThnā milnā vo bārhā

har ik adā.eñ aap kī haiñ mohtaram 'azīz

uñglī jo kaaT Daalī hai yūsuf ko dekh kar

us mah-jabīn-e-misr kī har ik qasam 'azīz

haiñ bā-shu'ūr jo bhī vo mere 'azīz haiñ

kaise kahūñ maiñ aap ko haiñ aap kam 'azīz

shahr-e-suḳhanvarāñ kā suḳhanvar huuñ adnā sā

merā suḳhan 'azīz hai merā qalam 'azīz

jo kuchh diyā hai us ne vo dil se qubūl hai

har ik ḳhushī 'azīz hai har ek ġham 'azīz

kal raat maiñ ne aa.ine se pūchh hī liyā

kitne hameñ 'azīz haiñ kitnoñ ko ham 'azīz

khai hai jo qasam wo hamein hai qasam 'aziz

'arman' ki qasam mujhe mera sanam 'aziz

rakkhe hain us ne zist mein jab se qadam 'aziz

us ke qadam 'aziz KHuda ki qasam 'aziz

hansna sisakna ruThna milna wo barha

har ek adaen aap ki hain mohtaram 'aziz

ungli jo kaT Dali hai yusuf ko dekh kar

us mah-jabin-e-misr ki har ek qasam 'aziz

hain ba-shu'ur jo bhi wo mere 'aziz hain

kaise kahun main aap ko hain aap kam 'aziz

shahr-e-suKHanwaran ka suKHanwar hun adna sa

mera suKHan 'aziz hai mera qalam 'aziz

jo kuchh diya hai us ne wo dil se qubul hai

har ek KHushi 'aziz hai har ek gham 'aziz

kal raat main ne aaine se puchh hi liya

kitne hamein 'aziz hain kitnon ko hum 'aziz