KHak-basta hain tah-e-KHak se bahar na hue

ḳhāk-basta haiñ tah-e-ḳhāk se bāhar na hue

jism apne kabhī poshāk se bāhar na hue

jur.at-e-bāzū-e-pairāk se bāhar na hue

ye samundar mirī imlāk se bāhar na hue

zehn-e-ḳhufta ne hama-vaqt sa.ī kī lekin

fikr ke zāviye idrāk se bāhar na hue

zaḳhm detī hai nayā roz mujhe bhuuk mirī

ye masā.ib mirī ḳhūrāk se bāhar na hue

zer-e-takmīl haiñ dast-e-fan-e-kūza-gar meñ

ham vo ījād haiñ jo chaak se bāhar na hue

shāḳh par ubhre haiñ tābinda guloñ kī sūrat

jo sharāre ḳhas-o-ḳhāshāk se bāhar na hue

kaam aa.ī na koī vaqt kī chārā-juī

zaḳhm-e-kohnā dil-e-sad-chāk se bāhar na hue

mahv-e-parvāz haiñ sadiyoñ se yūñhī shams-o-qamar

ye parinde had-e-aflāk se bāhar na hue

maslahat-kosh hue vaqt ke chehre 'sālim'

aks ā.īna-e-bebāk se bāhar na hue

KHak-basta hain tah-e-KHak se bahar na hue

jism apne kabhi poshak se bahar na hue

jurat-e-bazu-e-pairak se bahar na hue

ye samundar meri imlak se bahar na hue

zehn-e-KHufta ne hama-waqt sai ki lekin

fikr ke zawiye idrak se bahar na hue

zaKHm deti hai naya roz mujhe bhuk meri

ye masaib meri KHurak se bahar na hue

zer-e-takmil hain dast-e-fan-e-kuza-gar mein

hum wo ijad hain jo chaak se bahar na hue

shaKH par ubhre hain tabinda gulon ki surat

jo sharare KHas-o-KHashak se bahar na hue

kaam aai na koi waqt ki chaara-jui

zaKHm-e-kohna dil-e-sad-chaak se bahar na hue

mahw-e-parwaz hain sadiyon se yunhi shams-o-qamar

ye parinde had-e-aflak se bahar na hue

maslahat-kosh hue waqt ke chehre 'salim'

aks aaina-e-bebak se bahar na hue