KHak ho jaenge kirdar ye jaane mane

ḳhaak ho jā.eñge kirdār ye jaane maane

aur miTTī se mileñge sabhī tāne-bāne

zindagī kī to kabhī bhar na sakī almārī

pur kiye maiñ ne tamannāoñ ke saare ḳhāne

ham ye kin tund havāoñ kī zadoñ meñ aa.e

ham parinde to faqat aa.e the chugne daane

mujh ko dariyāoñ ne sahrāoñ meñ thāme rakkhā

maiñ ne dariyāoñ meñ Daale the kisī pal aane

canvas chāroñ taraf phailā huā hai 'zīshān'

par nahīñ zehn jo tasvīr ko puurā jaane

KHak ho jaenge kirdar ye jaane mane

aur miTTi se milenge sabhi tane-bane

zindagi ki to kabhi bhar na saki almari

pur kiye main ne tamannaon ke sare KHane

hum ye kin tund hawaon ki zadon mein aae

hum parinde to faqat aae the chugne dane

mujh ko dariyaon ne sahraon mein thame rakkha

main ne dariyaon mein Dale the kisi pal aane

canwas chaaron taraf phaila hua hai 'zishan'

par nahin zehn jo taswir ko pura jaane