KHak hoti hui tamir se Dar jate hain

ḳhaak hotī huī ta.amīr se Dar jaate haiñ

ham badaltī huī tasvīr se Dar jaate haiñ

raat ko chain se sote haiñ magar vaqt-e-sahar

ḳhvāb ke va.ada-e-tābīr se Dar jaate haiñ

vo siyāhī se likhī hotī hai ḳhuuñ se to nahīñ

phir bhī kyuuñ aap kī tahrīr se Dar jaate haiñ

DhūñDte phirte haiñ saḌkoñ pe ujāle lekin

ghar meñ aatī huī tanvīr se Dar jaate haiñ

aap to nahr kināre pe kiye haiñ qabza

aap kyuuñ pyaas ke ik tiir se Dar jaate haiñ

raqs karte hue mahloñ kī fasīloñ pe charāġh

aap kī dī huī tauqīr se Dar jaate haiñ

KHak hoti hui tamir se Dar jate hain

hum badalti hui taswir se Dar jate hain

raat ko chain se sote hain magar waqt-e-sahar

KHwab ke wada-e-tabir se Dar jate hain

wo siyahi se likhi hoti hai KHun se to nahin

phir bhi kyun aap ki tahrir se Dar jate hain

DhunDte phirte hain saDkon pe ujale lekin

ghar mein aati hui tanwir se Dar jate hain

aap to nahr kinare pe kiye hain qabza

aap kyun pyas ke ek tir se Dar jate hain

raqs karte hue mahlon ki fasilon pe charagh

aap ki di hui tauqir se Dar jate hain