KHak le jaen yahan se ki hawa le jaen

ḳhaak le jaa.eñ yahāñ se ki havā le jaa.eñ

kyā tire shahr meñ ham chhoḌ deñ kyā le jaa.eñ

bahr-e-ġham ham se bhī pairāk na dekhe hoñge

Dūbte jaa.eñ magar ḳhud ko sañbhāle jaa.eñ

ḳhushk pattoñ pe na tahrīr-e-mohabbat likkho

kal kahīñ in ko havā.eñ na uḌā le jaa.eñ

jaan māñge hai bahut un se ta'alluq rakhnā

jo bichhaḌne ke liye raah nikāle jaa.eñ

hārne vāloñ ne is ruḳh se bhī sochā hogā

sar kaTānā hai to hathiyār na Daale jaa.eñ

KHak le jaen yahan se ki hawa le jaen

kya tere shahr mein hum chhoD den kya le jaen

bahr-e-gham hum se bhi pairak na dekhe honge

Dubte jaen magar KHud ko sanbhaale jaen

KHushk patton pe na tahrir-e-mohabbat likkho

kal kahin in ko hawaen na uDa le jaen

jaan mange hai bahut un se ta'alluq rakhna

jo bichhaDne ke liye rah nikale jaen

haarne walon ne is ruKH se bhi socha hoga

sar kaTana hai to hathiyar na Dale jaen