KHak meri bikhar gai hai kya

ḳhaak merī bikhar ga.ī hai kyā

āsmāñ tak nazar ga.ī hai kyā

kis liye tum udaas phirte ho

dil se duniyā utar ga.ī hai kyā

apnī marzī se dar-ba-dar huuñ maiñ

tū batā apne ghar ga.ī hai kyā

ai sabā jis taraf hai phuul mirā

ye batā tū udhar ga.ī hai kyā

ye jo din meñ badal ga.ī hai raat

zulf terī sañvar ga.ī hai kyā

tere māthe pe kyoñ pasīna hai

ḳhvāb meñ tū bhī Dar ga.ī hai kyā

is tarah kyoñ udaas baiThe ho

koī dil meñ utar ga.ī hai kyā

saarī duniyā ulaT ga.ī merī

tū idhar se udhar ga.ī hai kyā

ye jo manzil hai paañv meñ 'ḳhālid'

justujū kaam kar ga.ī hai kyā

KHak meri bikhar gai hai kya

aasman tak nazar gai hai kya

kis liye tum udas phirte ho

dil se duniya utar gai hai kya

apni marzi se dar-ba-dar hun main

tu bata apne ghar gai hai kya

ai saba jis taraf hai phul mera

ye bata tu udhar gai hai kya

ye jo din mein badal gai hai raat

zulf teri sanwar gai hai kya

tere mathe pe kyon pasina hai

KHwab mein tu bhi Dar gai hai kya

is tarah kyon udas baiThe ho

koi dil mein utar gai hai kya

sari duniya ulaT gai meri

tu idhar se udhar gai hai kya

ye jo manzil hai panw mein 'KHalid'

justuju kaam kar gai hai kya