KHak par phenka hawaon ne uTha le mujhko

ḳhaak par pheñkā havāoñ ne uThā le mujh ko

phuul huuñ coat ke collar pe sajā le mujh ko

kab se maiñ ret ke marqad meñ paḌā huuñ zinda

sat.h par mauj kisī din to uchhāle mujh ko

surḳhī-e-ḳhūñ meñ chamak hai ki mirī āñkhoñ meñ

roz vo rañg dikhātā hai nirāle mujh ko

saath hī mujh ko girā le na lachaktā huā peḌ

uḌtā bādal na kahīñ saath uḌā le mujh ko

kaañp uTThī hai kisī aur ke ghar kī buniyād

aur koī chīḳhtā hai mujh meñ bachā le mujh ko

raakh ho jā.ūñ na ḳhvāhish kī jalan se 'hāmid'

koī is jalte jazīre se nikāle mujh ko

KHak par phenka hawaon ne uTha le mujh ko

phul hun coat ke collar pe saja le mujh ko

kab se main ret ke marqad mein paDa hun zinda

sath par mauj kisi din to uchhaale mujh ko

surKHi-e-KHun mein chamak hai ki meri aankhon mein

roz wo rang dikhata hai nirale mujh ko

sath hi mujh ko gira le na lachakta hua peD

uDta baadal na kahin sath uDa le mujh ko

kanp uTThi hai kisi aur ke ghar ki buniyaad

aur koi chiKHta hai mujh mein bacha le mujh ko

rakh ho jaun na KHwahish ki jalan se 'hamid'

koi is jalte jazire se nikale mujh ko