KHak sahraon ki palkon pe saja li humne

ḳhaak sahrāoñ kī palkoñ pe sajā lī ham ne

zindagī jaisī milī hañs ke nibhā lī ham ne

jām-e-ġham piite rahe mai kā sahārā na liyā

darmiyāñ dard ke ik raah nikālī ham ne

shahr-dar-shahr phire dasht-o-daman meñ bhaTke

masnad-e-qais dil-o-jāñ se sambhālī ham ne

ham bhī ashkoñ kī tijārat kā hunar rakhte haiñ

ashk arzāñ the bahut sharh baḌhā lī ham ne

lamha lamha tire ehsās ne karvaT badlī

raat ḳhvāboñ pe jamī gard haTā lī ham ne

ham se pūchhā thā kisī ne ki mohabbat kyā hai

be-ḳhudī meñ tirī tasvīr banā lī ham ne

ruuTh kar shahr-e-nigārāñ ke chalan se 'zākir'

apnī duniyā hī bahut duur basā lī ham ne

KHak sahraon ki palkon pe saja li hum ne

zindagi jaisi mili hans ke nibha li hum ne

jam-e-gham pite rahe mai ka sahaara na liya

darmiyan dard ke ek rah nikali hum ne

shahr-dar-shahr phire dasht-o-daman mein bhaTke

masnad-e-qais dil-o-jaan se sambhaali hum ne

hum bhi ashkon ki tijarat ka hunar rakhte hain

ashk arzan the bahut sharh baDha li hum ne

lamha lamha tere ehsas ne karwaT badli

raat KHwabon pe jami gard haTa li hum ne

hum se puchha tha kisi ne ki mohabbat kya hai

be-KHudi mein teri taswir bana li hum ne

ruTh kar shahr-e-nigaran ke chalan se 'zakir'

apni duniya hi bahut dur basa li hum ne