خاک سمجھے گا وہ نازکی کانچ کی

خاک سمجھے گا وہ نازکی کانچ کی

جس نے پائی نہیں زندگی کانچ کی

فصل دیکھی ہے ہم نے کھڑی کانچ کی

پوچھیے ہم سے خوش قامتی کانچ کی

یہ جو آنکھیں ہماری ہیں ان ہی کے بیچ

اور اک آنکھ ہے تیسری کانچ کی

شاعری کل بھی تھی کانچ ہے آج بھی

ہر فلاطوں نے گو کی نفی کانچ کی

میرے اطراف سب کانچ ہی کانچ ہے

پھر بھی لگتی ہے کچھ کچھ کمی کانچ کی

سنتے ہیں بخش دیتی ہے ٹھنڈک بڑی

تپتے صحرا کو اکثر نمی کانچ کی

چھین کر لاٹھی اندھے کی کس نے یہاں

ہاتھ اس کے تھما دی چھڑی کانچ کی

میرے اظہار کو بھی وہ اعجاز دے

دینے والے مجھے آگہی کانچ کی

دی ہے وصفیؔ نے پھر حیدرآباد سے

اک علامت غزل کو نئی کانچ کی