KHak samjhega wo nazuki kanch ki

ḳhaak samjhegā vo nāzukī kāñch kī

jis ne paa.ī nahīñ zindagī kāñch kī

fasl dekhī hai ham ne khaḌī kāñch kī

pūchhiye ham se ḳhush-qāmatī kāñch kī

ye jo āñkheñ hamārī haiñ in hī ke biich

aur ik aañkh hai tīsrī kāñch kī

shā'irī kal bhī thī kāñch hai aaj bhī

har falātūñ ne go kī nafī kāñch kī

mere atrāf sab kāñch hī kāñch hai

phir bhī lagtī hai kuchh kuchh kamī kāñch kī

sunte haiñ baḳhsh detī hai ThanDak baḌī

tapte sahrā ko aksar namī kāñch kī

chhīn kar lāThī andhe kī kis ne yahāñ

haath us ke thamā dī chhaḌī kāñch kī

mere iz.hār ko bhī vo e'jāz de

dene vaale mujhe āgahī kāñch kī

dī hai 'vasfī' ne phir Hyderabad se

ik 'alāmat ġhazal ko na.ī kāñch kī

KHak samjhega wo nazuki kanch ki

jis ne pai nahin zindagi kanch ki

fasl dekhi hai hum ne khaDi kanch ki

puchhiye hum se KHush-qamati kanch ki

ye jo aankhen hamari hain in hi ke bich

aur ek aankh hai tisri kanch ki

sha'iri kal bhi thi kanch hai aaj bhi

har falatun ne go ki nafi kanch ki

mere atraf sab kanch hi kanch hai

phir bhi lagti hai kuchh kuchh kami kanch ki

sunte hain baKHsh deti hai ThanDak baDi

tapte sahra ko aksar nami kanch ki

chhin kar laThi andhe ki kis ne yahan

hath us ke thama di chhaDi kanch ki

mere izhaar ko bhi wo e'jaz de

dene wale mujhe aagahi kanch ki

di hai 'wasfi' ne phir Hyderabad se

ek 'alamat ghazal ko nai kanch ki