KHak se lala-o-gul sumbul-o-raihan nikle

ḳhaak se lāla-o-gul sumbul-o-raihāñ nikle

tum bhī parde se nikal aao ki armāñ nikle

band āñkheñ kiye ham muntazir-e-jalva rahe

jab khulī aañkh to ḳhud jalva-e-jānāñ nikle

be-takalluf mujhe āzād-nigāhī manzūr

ḳhud ta'ayyun se magar jalva-e-jānāñ nikle

shaiḳh maiḳhāne meñ aane ko musalmān aayā

kaash maiḳhāne se nikle to musalmāñ nikle

kyā koī bazm-e-hasīñ zer-e-zamīñ aur bhī hai

phuul kyuuñ chāk-jigar chāk-garebāñ nikle

rang-o-bū qāfla-dar-qāfla aa.e the 'zahīn'

chand uḌte hue saa.e the gurezāñ nikle

KHak se lala-o-gul sumbul-o-raihan nikle

tum bhi parde se nikal aao ki arman nikle

band aankhen kiye hum muntazir-e-jalwa rahe

jab khuli aankh to KHud jalwa-e-jaanan nikle

be-takalluf mujhe aazad-nigahi manzur

KHud ta'ayyun se magar jalwa-e-jaanan nikle

shaiKH maiKHane mein aane ko musalman aaya

kash maiKHane se nikle to musalman nikle

kya koi bazm-e-hasin zer-e-zamin aur bhi hai

phul kyun chaak-jigar chaak-gareban nikle

rang-o-bu qafla-dar-qafla aae the 'zahin'

chand uDte hue sae the gurezan nikle