KHak to hum bhi har ek dasht ki chhane hue hain

ḳhaak to ham bhī har ik dasht kī chhāne hue haiñ

kuchh nayā karne kī koshish meñ purāne hue haiñ

sabz mausam kā pata jin se milā kartā thā

tīra-baḳhtoñ ke vahī shahr Thikāne hue haiñ

ḳhāna-e-dil meñ abhī tak haiñ vahī log ābād

jin ko ojhal hue āñkhoñ se zamāne hue haiñ

tiir shāḳhoñ meñ haiñ paivast parindoñ meñ nahīñ

kis shikārī ke ḳhatā itne nishāne hue haiñ

āb-o-gil hī kā karishma lab-o-ruḳhsār bhī haiñ

aisī kyā baat hai kyuuñ aap divāne hue haiñ

roz mat māñgiye miTTī kī mohabbat kā subūt

ham to ye jism usī ḳhaak kā chhāne hue haiñ

sher bhī likhtā huuñ aur ghar bhī chalātā huuñ janāb

kab kisī bojh ke shākī mire shāne hue haiñ

KHak to hum bhi har ek dasht ki chhane hue hain

kuchh naya karne ki koshish mein purane hue hain

sabz mausam ka pata jin se mila karta tha

tira-baKHton ke wahi shahr Thikane hue hain

KHana-e-dil mein abhi tak hain wahi log aabaad

jin ko ojhal hue aankhon se zamane hue hain

tir shaKHon mein hain paiwast parindon mein nahin

kis shikari ke KHata itne nishane hue hain

aab-o-gil hi ka karishma lab-o-ruKHsar bhi hain

aisi kya baat hai kyun aap diwane hue hain

roz mat mangiye miTTi ki mohabbat ka subut

hum to ye jism usi KHak ka chhane hue hain

sher bhi likhta hun aur ghar bhi chalata hun janab

kab kisi bojh ke shaki mere shane hue hain