KHak-zade KHak mein ya KHak par hain aaj bhi

ḳhāk-zāde ḳhaak meñ yā ḳhaak par haiñ aaj bhī

sāmne ik kūza-gar ke chaak par haiñ aaj bhī

ye na jaanā kis taraf se aa.ī chingārī magar

tohmateñ saarī ḳhas-o-ḳhāshāk par haiñ aaj bhī

jis takabbur kī badaulat chhin ga.e un ke huqūq

is ke asrāt-e-ra.ūnat naak par haiñ aaj bhī

maiñ ne rattī-bhar nizām-e-fikr ko badlā nahīñ

munhasir afkār sab idrāk par haiñ aaj bhī

jo azal se haiñ safīr uryāniyat ke un ke bhī

zāviye sab soch ke poshāk par haiñ aaj bhī

merā chehra jaisā thā vaisā dikhāyā ai 'zamīr'

sab yaqīn ā.īna-e-be-bāk par haiñ aaj bhī

KHak-zade KHak mein ya KHak par hain aaj bhi

samne ek kuza-gar ke chaak par hain aaj bhi

ye na jaana kis taraf se aai chingari magar

tohmaten sari KHas-o-KHashak par hain aaj bhi

jis takabbur ki badaulat chhin gae un ke huquq

is ke asraat-e-raunat nak par hain aaj bhi

main ne ratti-bhar nizam-e-fikr ko badla nahin

munhasir afkar sab idrak par hain aaj bhi

jo azal se hain safir uryaniyat ke un ke bhi

zawiye sab soch ke poshak par hain aaj bhi

mera chehra jaisa tha waisa dikhaya ai 'zamir'

sab yaqin aaina-e-be-bak par hain aaj bhi