KHaksari dil-e-nadan bacha ke rakhna

ḳhāksārī dil-e-nādān bachā ke rakhnā

sarfarāzī ke sab imkān bachā ke rakhnā

dil ke dāġhoñ kā ujālā ho ki sahrā kī bahār

'āshiqī kā chamanistān bachā ke rakhnā

zulf-e-shab-rang meñ raushan sahī tasvīr-e-jamāl

kufr phir kufr hai īmān bachā ke rakhnā

jab amānat hai kisī kī to amānat hī rahe

qatl ke din haiñ mirī jaan bachā ke rakhnā

kyā 'ajab aa.e kisī roz buzurgoñ kā ḳhayāl

merī DyoḌhī mirā dālān bachā ke rakhnā

baḌī mehnat se likhā hai shab-e-hijrāñ kā hisāb

sub.h vaalo mirā dīvān bachā ke rakhnā

aaj bhī shahr meñ tanhā nazar aate ho 'ra.īs'

zinda rahne ko ye pahchān bachā ke rakhnā

KHaksari dil-e-nadan bacha ke rakhna

sarfaraazi ke sab imkan bacha ke rakhna

dil ke daghon ka ujala ho ki sahra ki bahaar

'ashiqi ka chamanistan bacha ke rakhna

zulf-e-shab-rang mein raushan sahi taswir-e-jamal

kufr phir kufr hai iman bacha ke rakhna

jab amanat hai kisi ki to amanat hi rahe

qatl ke din hain meri jaan bacha ke rakhna

kya 'ajab aae kisi roz buzurgon ka KHayal

meri DyoDhi mera dalan bacha ke rakhna

baDi mehnat se likha hai shab-e-hijran ka hisab

subh walo mera diwan bacha ke rakhna

aaj bhi shahr mein tanha nazar aate ho 'rais'

zinda rahne ko ye pahchan bacha ke rakhna