KHaksari se yahan tak martaba uncha hua

ḳhāksārī se yahāñ tak martaba ūñchā huā

dīda-e-gardūñ kī putlī ḳhaak aag kā putlā huā

huuñ tilism-e-rang-o-bū ke pher meñ bhūlā huā

aadmī banda bashar hai kyā karūñ dhokā huā

ik piyāla thā ḳharābāt-e-azal kā āsmāñ

vo bhī apnī gardish-e-qismat se hai ulTā huā

ye ḳhamoshī hai guzargāh-e-jahāñ meñ al-amāñ

koī kuchh kahtā nahīñ aatā huā jaatā huā

'ālam-e-nairang kī rangīniyāñ haiñ dil-fareb

aur bhī vo rang laayā rang jo phīkā huā

mauj-e-rahmat hauz-e-kausar ke kināre le ga.ī

mai-kashoñ kā gulshan-e-firdaus meñ mela huā

ātish-e-ḳhāmosh ke mānind thā pahlū meñ dil

un ke dāman kī havā lagte hī angārā huā

mast āñkheñ dekh kar 'kaifī' kī mat jaatī rahī

kaun maiḳhāne meñ us se baḌh ke matvālā huā

KHaksari se yahan tak martaba uncha hua

dida-e-gardun ki putli KHak aag ka putla hua

hun tilism-e-rang-o-bu ke pher mein bhula hua

aadmi banda bashar hai kya karun dhoka hua

ek piyala tha KHarabaat-e-azal ka aasman

wo bhi apni gardish-e-qismat se hai ulTa hua

ye KHamoshi hai guzargah-e-jahan mein al-aman

koi kuchh kahta nahin aata hua jata hua

'alam-e-nairang ki ranginiyan hain dil-fareb

aur bhi wo rang laya rang jo phika hua

mauj-e-rahmat hauz-e-kausar ke kinare le gai

mai-kashon ka gulshan-e-firdaus mein mela hua

aatish-e-KHamosh ke manind tha pahlu mein dil

un ke daman ki hawa lagte hi angara hua

mast aankhen dekh kar 'kaifi' ki mat jati rahi

kaun maiKHane mein us se baDh ke matwala hua