KHaksaron se qarin rahta hai

ḳhāksāroñ se qarīñ rahtā hai

āsmāñ ḳhāk-nashīñ rahtā hai

hai ajab ḳhū-e-faqīrāna bhī

ik jahāñ zer-e-nagīñ rahtā hai

vaj.h duniyā bhī hai fitrat bhī hai

koī ḳhush koī hazīñ rahtā hai

bāġh-e-gul-gasht-e-sabā dil ko banā

naḳhl-e-sarsabz yahīñ rahtā hai

ghar kā sāmāñ nahīñ vīrāne meñ

shahr meñ ḳhauf-e-makīñ rahtā hai

āñkhoñ āñkhoñ meñ to kaT jaatī hai raat

dard farḳhanda-jabīñ rahtā hai

kaj-adā aisā nahīñ hai vo bhī

bojh ik dil pe kahīñ rahtā hai

go koī vaj.h-e-ta.alluq bhī nahīñ

maiñ kahīñ dhyān kahīñ rahtā hai

KHaksaron se qarin rahta hai

aasman KHak-nashin rahta hai

hai ajab KHu-e-faqirana bhi

ek jahan zer-e-nagin rahta hai

wajh duniya bhi hai fitrat bhi hai

koi KHush koi hazin rahta hai

bagh-e-gul-gasht-e-saba dil ko bana

naKHl-e-sarsabz yahin rahta hai

ghar ka saman nahin virane mein

shahr mein KHauf-e-makin rahta hai

aankhon aankhon mein to kaT jati hai raat

dard farKHanda-jabin rahta hai

kaj-ada aisa nahin hai wo bhi

bojh ek dil pe kahin rahta hai

go koi wajh-e-talluq bhi nahin

main kahin dhyan kahin rahta hai