Khaali baiThe kyun din kaTen aao re ji ek kaam karen

ḳhālī baiThe kyuuñ din kāTeñ aao re jī ik kaam kareñ

vo to haiñ raaja ham baneñ parjā aur jhuk jhuk ke salām kareñ

khul paḌne meñ nākāmī hai gum ho kar kuchh kaam kareñ

des purānā bhes banā ho naam badal kar naam kareñ

donoñ jahāñ meñ ḳhidmat terī ḳhādim ko maḳhdūm banā.e

pariyāñ jis ke paañv dabā.eñ hūreñ jis kā kaam kareñ

hijr kā sannāTā kho degī gahmā-gahmī nāloñ kī

raat akele kyūñkar kāTeñ sab kī niiñd harām kareñ

mere burā kahlāne se to achchhe ban nahīñ sakte aap

baiThe-baiThā.e ye kyā sūjhī aao use badnām kareñ

dil kī ḳhushī pāband na niklī rasm-o-rivāj-e-ālam kī

phūloñ par to chain na aa.e kāñToñ par ārām kareñ

aise hī kaam kiyā kartī hai gardish un kī āñkhoñ kī

shaam ko chāhe sub.h banā deñ sub.h ko chāhe shaam kareñ

lā-mahdūd fazā meñ phir kar had koī kyā Dālegā

puḳhta-kār-e-junūñ ham bhī haiñ kyuuñ ye ḳhayāl-e-ḳhām kareñ

nām-e-vafā se chiḌh un ko aur 'ārzū' is ḳhū se majbūr

kyūñkar āḳhir dil bahlā.eñ kis vahshī ko raam kareñ

KHali baiThe kyun din kaTen aao re ji ek kaam karen

wo to hain raja hum banen parja aur jhuk jhuk ke salam karen

khul paDne mein nakaami hai gum ho kar kuchh kaam karen

des purana bhes bana ho nam badal kar nam karen

donon jahan mein KHidmat teri KHadim ko maKHdum banae

pariyan jis ke panw dabaen huren jis ka kaam karen

hijr ka sannaTa kho degi gahma-gahmi nalon ki

raat akele kyunkar kaTen sab ki nind haram karen

mere bura kahlane se to achchhe ban nahin sakte aap

baiThe-baiThae ye kya sujhi aao use badnam karen

dil ki KHushi paband na nikli rasm-o-riwaj-e-alam ki

phulon par to chain na aae kanTon par aaram karen

aise hi kaam kiya karti hai gardish un ki aankhon ki

sham ko chahe subh bana den subh ko chahe sham karen

la-mahdud faza mein phir kar had koi kya Dalega

puKHta-kar-e-junun hum bhi hain kyun ye KHayal-e-KHam karen

nam-e-wafa se chiDh un ko aur 'arzu' is KHu se majbur

kyunkar aaKHir dil bahlaen kis wahshi ko ram karen