Khaali hathon se lauT kar jaana

ḳhālī hāthoñ se lauT kar jaanā

kitnā mushkil hai aise ghar jaanā

achchhā hotā hai aadmī ke liye

baa'z auqāt thoḌā Dar jaanā

shak dilā.egā sab ko phūloñ par

baaġh meñ titliyoñ kā mar jaanā

jhūTe vā'de kiye haiñ logoñ ne

ek do baar tum bhī kar jaanā

us ne saaya hamārā chhīn liyā

ham ne jis shaḳhs ko shajar jaanā

saarī duniyā yahī to kartī hai

tum bhī hañste hue guzar jaanā

āsmāñ kā chalan durust nahīñ

is bulandī se tum utar jaanā

us ke baazū baḌe kushāda haiñ

ai mire dil zarā bikhar jaanā

achchhā lagtā hai pyaar meñ tere

bātoñ bātoñ meñ yuuñ mukar jaanā

tū palaT aaya par nahīñ mumkin

tere shā'ir kā ab sudhar jaanā

koī achchhā shagun nahīñ bhaa.ī

ret se jhiil kā ye bhar jaanā

haath tab kāTne kā sochā gayā

jab du'āoñ ko be-asar jaanā

maiñ bahut e'tibār kartā huuñ

tum koī ghaat hī na kar jaanā

tere ruḳh ke sabab huā mumkin

phuul kā is tarah nikhar jaanā

koī taqlīd ke nahīñ qābil

tum faqat apne aap par jaanā

kar gayā shal mirī samā'at ko

terā ḳhāmoshī se guzar jaanā

ab maiñ ārām karnā chāhūñgā

āḳhirī vaar ho to kar jaanā

saath apne bhī ham rahe 'ātif'

ham ne ḳhud ko nahīñ magar jaanā

KHali hathon se lauT kar jaana

kitna mushkil hai aise ghar jaana

achchha hota hai aadmi ke liye

ba'z auqat thoDa Dar jaana

shak dilaega sab ko phulon par

bagh mein titliyon ka mar jaana

jhuTe wa'de kiye hain logon ne

ek do bar tum bhi kar jaana

us ne saya hamara chhin liya

hum ne jis shaKHs ko shajar jaana

sari duniya yahi to karti hai

tum bhi hanste hue guzar jaana

aasman ka chalan durust nahin

is bulandi se tum utar jaana

us ke bazu baDe kushada hain

ai mere dil zara bikhar jaana

achchha lagta hai pyar mein tere

baaton baaton mein yun mukar jaana

tu palaT aaya par nahin mumkin

tere sha'ir ka ab sudhar jaana

koi achchha shagun nahin bhai

ret se jhil ka ye bhar jaana

hath tab kaTne ka socha gaya

jab du'aon ko be-asar jaana

main bahut e'tibar karta hun

tum koi ghat hi na kar jaana

tere ruKH ke sabab hua mumkin

phul ka is tarah nikhar jaana

koi taqlid ke nahin qabil

tum faqat apne aap par jaana

kar gaya shal meri sama'at ko

tera KHamoshi se guzar jaana

ab main aaram karna chahunga

aaKHiri war ho to kar jaana

sath apne bhi hum rahe 'atif'

hum ne KHud ko nahin magar jaana