Khaali hain jitne jam wo bhar jaane dijiye

ḳhālī haiñ jitne jaam vo bhar jaane dījiye

tishna-labī kā daur guzar jaane dījiye

phir chheḌiyegā aap bhī vā’da-shikan kī baat

dil kā har ek zaḳhm to bhar jaane dījiye

us kī masāfatoñ kī huiiñ manzileñ tamām

niklā huā hai sub.h kā ghar jaane dījiye

josh-e-junūñ meñ shauq se patthar uThā.iye

'aql-o-ḳhirad ko had se guzar jaane dījiye

vā'de pe jiite jiite hī 'umreñ guzar ga.iiñ

tūl-e-shab-e-firāq kā Dar jaane dījiye

jis meñ surūr hai na harārat na valvala

behtar hai aise jiine se mar jaane dījiye

zehnoñ pe ban ke bojh na rah jaa.e zindagī

āñkhoñ meñ ban ke ḳhvāb bikhar jaane dījiye

yādoñ ke saare zaḳhm na ho jaa.eñ mundamil

'bismil' koī to zaḳhm ubhar jaane dījiye

KHali hain jitne jam wo bhar jaane dijiye

tishna-labi ka daur guzar jaane dijiye

phir chheDiyega aap bhi wa’da-shikan ki baat

dil ka har ek zaKHm to bhar jaane dijiye

us ki masafaton ki huin manzilen tamam

nikla hua hai subh ka ghar jaane dijiye

josh-e-junun mein shauq se patthar uThaiye

'aql-o-KHirad ko had se guzar jaane dijiye

wa'de pe jite jite hi 'umren guzar gain

tul-e-shab-e-firaq ka Dar jaane dijiye

jis mein surur hai na hararat na walwala

behtar hai aise jine se mar jaane dijiye

zehnon pe ban ke bojh na rah jae zindagi

aankhon mein ban ke KHwab bikhar jaane dijiye

yaadon ke sare zaKHm na ho jaen mundamil

'bismil' koi to zaKHm ubhar jaane dijiye