Khaali-uz-zehn hun yaadon ko sada di jae

ḳhālī-uz-zehn huuñ yādoñ ko sadā dī jaa.e

rāsta saaf hai kuchh gard uḌā dī jaa.e

aaj kā din bhī dar-o-bām ko takte guzrā

aaj kī raat bhī āñkhoñ meñ gañvā dī jaa.e

abhī mahfil meñ nazar aate haiñ nādim chehre

lau charāġhoñ kī zarā aur ghaTā dī jaa.e

vahī darvāza vahī ghar vahī maiñ huuñ lekin

kaun rahtā hai yahāñ kis ko sadā dī jaa.e

raat ke saath huā ḳhatm sitāroñ kā safar

apne ashkoñ kī bhī ab sham.a bujhā dī jaa.e

kyā ajab shaḳhs thā jis ne mujhe ye zehn diyā

yaad rakhne kī har ik baat bhulā dī jaa.e

saarā māhaul pur-asrār hai 'az.har' sāhab

shahr-e-iḳhlās meñ ab kis ko sadā dī jaa.e

KHali-uz-zehn hun yaadon ko sada di jae

rasta saf hai kuchh gard uDa di jae

aaj ka din bhi dar-o-baam ko takte guzra

aaj ki raat bhi aankhon mein ganwa di jae

abhi mahfil mein nazar aate hain nadim chehre

lau charaghon ki zara aur ghaTa di jae

wahi darwaza wahi ghar wahi main hun lekin

kaun rahta hai yahan kis ko sada di jae

raat ke sath hua KHatm sitaron ka safar

apne ashkon ki bhi ab shama bujha di jae

kya ajab shaKHs tha jis ne mujhe ye zehn diya

yaad rakhne ki har ek baat bhula di jae

sara mahaul pur-asrar hai 'azhar' sahab

shahr-e-iKHlas mein ab kis ko sada di jae