خاموش ہو گئی تھی زباں دیکھتے رہے

خاموش ہو گئی تھی زباں دیکھتے رہے

ہر سمت آگ اور دھواں دیکھتے رہے

دیکھا جدھر جدھر مجھے منظر وہی ملا

گردن کو زیر نوک سناں دیکھتے رہے

ڈھوتے رہے ہیں لاشۂ فصل بہار کو

گلشن میں دور باد خزاں دیکھتے رہے

قسطوں میں توڑتی رہی دم لشکری زباں

اہل قلم سب اہل زباں دیکھتے رہے

محفوظ کب رہے وہ زمانے کی چال سے

ہر موڑ پر جو سود و زیاں دیکھتے رہے

پہنچے ولیؔ کے شہر میں اک روز ہم مجیدؔ

برپا تھا حشر آہ و فغاں دیکھتے رہے