خاموش جھیل میں کوئی کنکر گرا نہیں

خاموش جھیل میں کوئی کنکر گرا نہیں

لہروں کا زندگی میں مری سلسلہ نہیں

بادل کی طرح آنکھیں برستی رہیں مگر

شاداب پھر بھی برگ محبت ہوا نہیں

مکڑی نے اس کی آنکھوں پہ جالے لگا دئے

مدت سے انتظار کا عقدہ کھلا نہیں

روشن ہوئی حیات کسی کے خیال سے

یوں تو چراغ گھر میں ہمارے جلا نہیں

ماضی بھی محو خواب ہوا کب کا دوستو

مستقبل قریب کا بھی در کھلا نہیں

یہ موسم امید بھی کب کا گزر گیا

عادلؔ شجر پہ آس کا اک پھل لگا نہیں