KHamosh zamzame hain mera harf-e-zar chup

ḳhāmosh zamzame haiñ mirā harf-e-zār chup

har iḳhtiyār chup hai har ik e.atibār chup

bād-e-sumūm darpai āzār dekh kar

sakte meñ be-qarār hai bād-e-bahār chup

manzar nahīñ haiñ bolte sahrā udaas hai

pathrā ga.ī hai aañkh dil-e-dāġhdār chup

jo kuchh bhī ho rahā hai ye maqsūm to nahīñ

bas tujh ko khā ga.ī hai tirī sogvār chup

har ek ko huuñ gosh-bar-āvāz dekhtā

oḌhe hue hoñ jab se maiñ ik bā-vaqār chup

harf-e-duā na dast-e-talab dar pe aan kar

lab par faqat hai raqs meñ ik dil-figār chup

KHamosh zamzame hain mera harf-e-zar chup

har iKHtiyar chup hai har ek eatibar chup

baad-e-sumum darpai aazar dekh kar

sakte mein be-qarar hai baad-e-bahaar chup

manzar nahin hain bolte sahra udas hai

pathra gai hai aankh dil-e-daghdar chup

jo kuchh bhi ho raha hai ye maqsum to nahin

bas tujh ko kha gai hai teri sogwar chup

har ek ko hun gosh-bar-awaz dekhta

oDhe hue hon jab se main ek ba-waqar chup

harf-e-dua na dast-e-talab dar pe aan kar

lab par faqat hai raqs mein ek dil-figar chup