خاموشی کہہ رہی تھی ملاقات ہو گئی

خاموشی کہہ رہی تھی ملاقات ہو گئی

آنسو بتا رہے ہیں کوئی بات ہو گئی

ظاہر جو بزم میں مری اوقات ہو گئی

رسوا ہر اک نظر میں مری ذات ہو گئی

جاں ہار کے بھی جیت گیا ہوں کسی کا دل

دنیا سمجھ رہی ہے مری مات ہو گئی

یہ کون مجھ سے ملنے سر شام آ گیا

لگتا ہے جیسے دن کی شروعات ہو گئی

اک دوسرے سے دور کچھ ایسے ہوئے ہیں ہم

دنیا سے ختم جیسے مساوات ہو گئی

ڈالی تھی اس نے مجھ پہ بس اک سرسری نگاہ

محسوس یہ ہوا کہ کرامات ہو گئی

کہنے کو کچھ نہیں تھا حکومت کے پاس جب

اچھا تو یہ ہوا کہ خرافات ہو گئی