KHamoshi KHud apni sada ho ye bhi to ho sakta hai

ḳhāmoshī ḳhud apnī sadā ho ye bhī to ho saktā hai

sannāTā hī guuñj rahā ho ye bhī to ho saktā hai

merā maazī mujh se bichhaḌ kar kyā jaane kis haal meñ hai

merī tarah vo bhī tanhā ho ye bhī to ho saktā hai

sahrā sahrā kab tak maiñ DhūñDūñ ulfat kā ik aalam

aalam aalam ik sahrā ho ye bhī to ho saktā hai

ahl-e-tūfāñ soch rahe haiñ sāhil Duubā jaatā hai

ḳhud un kā dil Duub rahā ho ye bhī to ho saktā hai

in madh-mātī āñkhoñ par ye jhuum ke aanā zulfoñ kā

bāda-kashoñ ko aam salā ho ye bhī to ho saktā hai

yaaro merā kyā hai kaf-e-qātil kī ra.anā.ī dekho

ḳhuun hī kyuuñ ho rañg-e-hinā ho ye bhī to ho saktā hai

saarī mahfil meñ ik tum se us ko taġhāful kyuuñ hai 'zakā'

koī ḳhaas andāz-e-vafā ho ye bhī to ho saktā hai

KHamoshi KHud apni sada ho ye bhi to ho sakta hai

sannaTa hi gunj raha ho ye bhi to ho sakta hai

mera mazi mujh se bichhaD kar kya jaane kis haal mein hai

meri tarah wo bhi tanha ho ye bhi to ho sakta hai

sahra sahra kab tak main DhunDun ulfat ka ek aalam

aalam aalam ek sahra ho ye bhi to ho sakta hai

ahl-e-tufan soch rahe hain sahil Duba jata hai

KHud un ka dil Dub raha ho ye bhi to ho sakta hai

in madh-mati aankhon par ye jhum ke aana zulfon ka

baada-kashon ko aam sala ho ye bhi to ho sakta hai

yaro mera kya hai kaf-e-qatil ki ranai dekho

KHun hi kyun ho rang-e-hina ho ye bhi to ho sakta hai

sari mahfil mein ek tum se us ko taghaful kyun hai 'zaka'

koi KHas andaz-e-wafa ho ye bhi to ho sakta hai