KHamoshi tak to ek sada le gai mujhe

ḳhāmoshī tak to ek sadā le ga.ī mujhe

phir us se aage tab-e-rasā le ga.ī mujhe

kyā aañkh thī ki mauj-e-baqā kī tarah milī

kyā mauj thī ki misl-e-fanā le ga.ī mujhe

miTTī ko chuum lene kī hasrat hī rah ga.ī

TuuTā jo shāḳh se to havā le ga.ī mujhe

dasht-e-junūñ se aa.ī thī bastī meñ bād-e-shauq

lauTī to apne saath bahā le ga.ī mujhe

ai jur.at-e-farār tirā shukriya ki tū

rishtoñ ke pech-o-ḳham se bachā le ga.ī mujhe

KHamoshi tak to ek sada le gai mujhe

phir us se aage tab-e-rasa le gai mujhe

kya aankh thi ki mauj-e-baqa ki tarah mili

kya mauj thi ki misl-e-fana le gai mujhe

miTTi ko chum lene ki hasrat hi rah gai

TuTa jo shaKH se to hawa le gai mujhe

dasht-e-junun se aai thi basti mein baad-e-shauq

lauTi to apne sath baha le gai mujhe

ai jurat-e-farar tera shukriya ki tu

rishton ke pech-o-KHam se bacha le gai mujhe