KHamushi iltifat hai shayad

ḳhāmushī iltifāt hai shāyad

ek mohmal sī baat hai shāyad

dard-e-dil hī barāt hai shāyad

husn kī ye zakāt hai shāyad

zindagī do adam kī barzaḳh hai

is liye be-sabāt hai shāyad

zindagī maut se ibārat hai

maut sharh-e-hayāt hai shāyad

kitne vīrāne ho ga.e ābād

aap kā iltifāt hai shāyad

kuchh nahīñ sochtā javānī meñ

ye bhī tārīk raat hai shāyad

kahte kahte jo ho ga.e ḳhāmosh

raaz kī koī baat hai shāyad

is yaqīñ par kalīm haiñ behosh

jalva-e-husn-e-zāt hai shāyad

dil kī taskīn ruuh kī rāhat

aah vaj.h-e-hayāt hai shāyad

aañkh ke til ke ek zarre meñ

simTī kul kā.enāt hai shāyad

tishna-kāmī-e-karbalā hai ishq

husn āb-e-furāt hai shāyad

'sho.ala' is dil meñ Tiis uThtī hai

aap kā iltifāt hai shāyad

KHamushi iltifat hai shayad

ek mohmal si baat hai shayad

dard-e-dil hi baraat hai shayad

husn ki ye zakat hai shayad

zindagi do adam ki barzaKH hai

is liye be-sabaat hai shayad

zindagi maut se ibarat hai

maut sharh-e-hayat hai shayad

kitne virane ho gae aabaad

aap ka iltifat hai shayad

kuchh nahin sochta jawani mein

ye bhi tarik raat hai shayad

kahte kahte jo ho gae KHamosh

raaz ki koi baat hai shayad

is yaqin par kalim hain behosh

jalwa-e-husn-e-zat hai shayad

dil ki taskin ruh ki rahat

aah wajh-e-hayat hai shayad

aankh ke til ke ek zarre mein

simTi kul kaenat hai shayad

tishna-kaami-e-karbala hai ishq

husn aab-e-furaat hai shayad

'shoala' is dil mein Tis uThti hai

aap ka iltifat hai shayad