خار ہی خار ہیں گلاب نہیں

خار ہی خار ہیں گلاب نہیں

اس کے تحفے کا بھی جواب نہیں

چاند ہو تم میں اک چراغ سہی

پر میں سورج سے فیضیاب نہیں

نیند ٹوٹے گی جان جاؤ گے

میں حقیقت ہوں کوئی خواب نہیں

سب کو اوقات کے سوا بخشا

رحمتوں کا تری حساب نہیں

جو بھی مانگا ملا ہمیں لیکن

اک وہی ہے جو دستیاب نہیں

حسن سج کر بہت نکھرتا ہے

سادگی کا مگر جواب نہیں

عشق کی قید سے نکلنے کو

کوئی ترکیب کامیاب نہیں

ایسی تقدیر بھی نہ ہو نیرجؔ

شام ہجراں ہے اور شراب نہیں