Khaar ko phul kahen zahr ko phal likhna hai

ḳhaar ko phuul kaheñ zahr ko phal likhnā hai

dil kī taḳhtī pe tirā naam ġhazal likhnā hai

pahle likhnā hai tire pyaar ko sahbā-e-junūñ

phir use dasht-e-ma’ānī meñ saral likhnā hai

ziist ke baab meñ dardoñ kī numā.ish ke liye

zaḳhm ko daaġh kaheñ aaj ko kal likhnā hai

aañkh ke naqsh pe ik ḳhvāb sajā kar terā

dil jo vīrāñ hai use tāj-mahal likhnā hai

zehn ke dar pe udāsī kī siyāhī bhar kar

apne jīvan ko mujhe jām-e-ajal likhnā hai

fikr jab dil ke marākiz se numū pā jaa.e

phir mujhe barf ko aag aag ko jal likhnā hai

ruuh ke pech bhī khulne nahīñ paate haiñ kabhī

us pe ye fikr ki armāñ ko jadal likhnā hai

maiñ nimaT aayā huuñ be-mehrī-e-yārāñ se ki ab

sab kī ranjish ko mukāfāt-e-'amal likhnā hai

'ishq ik āg-e-siyah-rez hai is meñ 'kāvish'

dam-ba-dam khil ke mujhe ḳhud ko kañval likhnā hai

KHar ko phul kahen zahr ko phal likhna hai

dil ki taKHti pe tera nam ghazal likhna hai

pahle likhna hai tere pyar ko sahba-e-junun

phir use dasht-e-ma’ani mein saral likhna hai

zist ke bab mein dardon ki numaish ke liye

zaKHm ko dagh kahen aaj ko kal likhna hai

aankh ke naqsh pe ek KHwab saja kar tera

dil jo viran hai use taj-mahal likhna hai

zehn ke dar pe udasi ki siyahi bhar kar

apne jiwan ko mujhe jam-e-ajal likhna hai

fikr jab dil ke marakiz se numu pa jae

phir mujhe barf ko aag aag ko jal likhna hai

ruh ke pech bhi khulne nahin pate hain kabhi

us pe ye fikr ki arman ko jadal likhna hai

main nimaT aaya hun be-mehri-e-yaran se ki ab

sab ki ranjish ko mukafat-e-'amal likhna hai

'ishq ek aag-e-siyah-rez hai is mein 'kawish'

dam-ba-dam khil ke mujhe KHud ko kanwal likhna hai