خار ان کی میزبانی کر رہے تھے

خار ان کی میزبانی کر رہے تھے

جو گلوں کو زعفرانی کر رہے تھے

وہ ہمارا ورد بنتا جا رہا تھا

یاد اس کو منہ زبانی کر رہے تھے

کر بھی کیا سکتے تھے ہم پھرتے جنوں میں

بس چنر کو تیری دھانی کر رہے تھے

کتنا مشکل ہو گیا تھا پاس آنا

آپ کتنی آنا کانی کر رہے تھے

کاٹ کر پربت کو رستا کرنے والے

عشق اپنا داستانی کر رہے تھے

قید میں صیاد کی بھوکے پرندے

دانہ دانہ پانی پانی کر رہے تھے

تتلیوں کے پیچھے پیچھے پھرتے عشرتؔ

رائیگاں اپنی جوانی کر رہے تھے