KHabar hai mahrumiyon se aage nikal chuka hai

ḳhabar hai mahrūmiyoñ se aage nikal chukā hai

faqīr vīrāniyoñ se aage nikal chukā hai

hameñ ye tākīd kī ga.ī hai ki hañste rahiye

so qahqaha siskiyoñ se aage nikal chukā hai

ye kis ta.āqub meñ bujh rahī haiñ hamārī āñkheñ

ye kaun bīnā.iyoñ se aage nikal chukā hai

maqām-e-hairat pe aql pahuñchī khulā muamma

qayās hairāniyoñ se aage nikal chukā hai

havās mahloñ meñ aaj qindīl jal bujhī haiñ

pa ik diyā āñdhiyoñ se aage nikal chukā hai

ai sho.abda-gar ḳhabar hai tujh ko ki sho.abada-bīñ

tire tamāshā.iyoñ se aage nikal chukā hai

tabīb āb-e-hayāt laa.e haiñ kaasa bhar lo

marīz āsāniyoñ se aage nikal chukā hai

qafas meñ rah kar lagā hai jī aise beḌiyoñ se

asiir āzadiyoñ se aage nikal chukā hai

bayān ke jangaloñ meñ jis ko talāshte ho

vo zabt kī vādiyoñ se aage nikal chukā hai

suḳhan-salāḳheñ bhī zang-ālūd ho chukī haiñ

shu.ūr bhī qāfiyoñ se aage nikal chukā hai

fanā kī bai'at meñ aa chukā hai junūn-e-'jānī'

baqā ke ab zāviyoñ se aage nikal chukā hai

KHabar hai mahrumiyon se aage nikal chuka hai

faqir viraniyon se aage nikal chuka hai

hamein ye takid ki gai hai ki hanste rahiye

so qahqaha siskiyon se aage nikal chuka hai

ye kis taaqub mein bujh rahi hain hamari aankhen

ye kaun binaiyon se aage nikal chuka hai

maqam-e-hairat pe aql pahunchi khula muamma

qayas hairaniyon se aage nikal chuka hai

hawas mahlon mein aaj qindil jal bujhi hain

pa ek diya aandhiyon se aage nikal chuka hai

ai shoabda-gar KHabar hai tujh ko ki shoabada-bin

tere tamashaiyon se aage nikal chuka hai

tabib aab-e-hayat lae hain kasa bhar lo

mariz aasaniyon se aage nikal chuka hai

qafas mein rah kar laga hai ji aise beDiyon se

asir aazadiyon se aage nikal chuka hai

bayan ke jangalon mein jis ko talashte ho

wo zabt ki wadiyon se aage nikal chuka hai

suKHan-salaKHen bhi zang-alud ho chuki hain

shuur bhi qafiyon se aage nikal chuka hai

fana ki bai'at mein aa chuka hai junun-e-'jaani'

baqa ke ab zawiyon se aage nikal chuka hai