خبر ہے محرومیوں سے آگے نکل چکا ہے

خبر ہے محرومیوں سے آگے نکل چکا ہے

فقیر ویرانیوں سے آگے نکل چکا ہے

ہمیں یہ تاکید کی گئی ہے کہ ہنستے رہئے

سو قہقہہ سسکیوں سے آگے نکل چکا ہے

یہ کس تعاقب میں بجھ رہی ہیں ہماری آنکھیں

یہ کون بینائیوں سے آگے نکل چکا ہے

مقام حیرت پہ عقل پہنچی کھلا معمہ

قیاس حیرانیوں سے آگے نکل چکا ہے

حواس محلوں میں آج قندیل جل بجھی ہیں

پہ اک دیا آندھیوں سے آگے نکل چکا ہے

اے شعبدہ گر خبر ہے تجھ کو کہ شعبدہ بیں

ترے تماشائیوں سے آگے نکل چکا ہے

طبیب آب حیات لائے ہیں کاسہ بھر لو

مریض آسانیوں سے آگے نکل چکا ہے

قفس میں رہ کر لگا ہے جی ایسے بیڑیوں سے

اسیر آزادیوں سے آگے نکل چکا ہے

بیان کے جنگلوں میں جس کو تلاشتے ہو

وہ ضبط کی وادیوں سے آگے نکل چکا ہے

سخن سلاخیں بھی زنگ آلود ہو چکی ہیں

شعور بھی قافیوں سے آگے نکل چکا ہے

فنا کی بیعت میں آ چکا ہے جنون جانیؔ

بقا کے اب زاویوں سے آگے نکل چکا ہے