KHabar mili ki hamein wo bhulae baiThe hain

ḳhabar milī ki hameñ vo bhulā.e baiThe haiñ

ham apnā tab se kaleja dabā.e baiThe haiñ

bahut udaas hai us vaqt se ye dil merā

sunā hai jab se vo mehñdī lagā.e baiThe haiñ

tumhāre aane kī ummīd kā charāġh liye

tumhārī raah meñ palkeñ bichhā.e baiThe haiñ

unheñ ḳhabar huī aane kī mere tab se vo

ik āsmān sā sar pe uThā.e baiThe haiñ

zarā idhar bhī ho ik chashm-e-iltifāt tirī

divāne dar pe tire sar jhukā.e baiThe haiñ

baġhair tere chamak hī nahīñ hai mahfil meñ

charāġh jitne the ham sab jalā.e baiThe haiñ

mizāj un kā abhī tak nahīñ samajh paa.e

'taqī' vo chehre kā ruḳh kyoñ ghumā.e baiThe haiñ

KHabar mili ki hamein wo bhulae baiThe hain

hum apna tab se kaleja dabae baiThe hain

bahut udas hai us waqt se ye dil mera

suna hai jab se wo mehndi lagae baiThe hain

tumhaare aane ki ummid ka charagh liye

tumhaari rah mein palken bichhae baiThe hain

unhen KHabar hui aane ki mere tab se wo

ek aasman sa sar pe uThae baiThe hain

zara idhar bhi ho ek chashm-e-iltifat teri

diwane dar pe tere sar jhukae baiThe hain

baghair tere chamak hi nahin hai mahfil mein

charagh jitne the hum sab jalae baiThe hain

mizaj un ka abhi tak nahin samajh pae

'taqi' wo chehre ka ruKH kyon ghumae baiThe hain