خبر ملی کہ ہمیں وہ بھلائے بیٹھے ہیں

خبر ملی کہ ہمیں وہ بھلائے بیٹھے ہیں

ہم اپنا تب سے کلیجہ دبائے بیٹھے ہیں

بہت اداس ہے اس وقت سے یہ دل میرا

سنا ہے جب سے وہ مہندی لگائے بیٹھے ہیں

تمہارے آنے کی امید کا چراغ لیے

تمہاری راہ میں پلکیں بچھائے بیٹھے ہیں

انہیں خبر ہوئی آنے کی میرے تب سے وہ

اک آسمان سا سر پہ اٹھائے بیٹھے ہیں

ذرا ادھر بھی ہو اک چشم التفات تری

دوانے در پہ ترے سر جھکائے بیٹھے ہیں

بغیر تیرے چمک ہی نہیں ہے محفل میں

چراغ جتنے تھے ہم سب جلائے بیٹھے ہیں

مزاج ان کا ابھی تک نہیں سمجھ پائے

تقیؔ وہ چہرے کا رخ کیوں گھمائے بیٹھے ہیں