خبر نہیں کہ ابھی اور کیا ہے قسمت میں

خبر نہیں کہ ابھی اور کیا ہے قسمت میں

سنبھل گیا ہوں جو گر کے رہ محبت میں

شکایت ستم ناروا کے بعد نہ پوچھ

انہیں بھی دیکھ لیا عالم ندامت میں

امید تجھ سے بھی ٹوٹی تو کیا ہوا اے دوست

مری تو یوں ہی گزرتی ہے یاس و حسرت میں

چبھا جو پاؤں میں کانٹا تو سیر بھول گیا

بڑے تپاک سے آیا تھا باغ الفت میں

یہیں پہ ختم نہیں سلسلہ جفاؤں کا

ابھی تو اور ستم سہنے ہیں محبت میں

لبوں پہ آہ خلش دل میں آنکھ میں آنسو

کس اہتمام سے جینا پڑا محبت میں

اب احتیاط سے اس گل کی بات کر ناظمؔ

گئے وہ دن کہ زمانہ تھا خواب غفلت میں