KHabar nahin ki abhi aur kya hai qismat mein

ḳhabar nahīñ ki abhī aur kyā hai qismat meñ

sañbhal gayā huuñ jo gir ke rah-e-mohabbat meñ

shikāyat-e-sitam-e-nāravā ke baa'd na pūchh

unheñ bhī dekh liyā ālam-e-nadāmat meñ

umiid tujh se bhī TuuTī to kyā huā ai dost

mirī to yuuñ hī guzartī hai yās-o-hasrat meñ

chubhā jo paañv meñ kāñTā to sair bhuul gayā

baḌe tapāk se aaya thā bāġh-e-ulfat meñ

yahīñ pe ḳhatm nahīñ silsila jafāoñ kā

abhī to aur sitam sahne haiñ mohabbat meñ

laboñ pe aah ḳhalish dil meñ aañkh meñ aañsū

kis ehtimām se jiinā paḌā mohabbat meñ

ab ehtiyāt se is gul kī baat kar 'nāzim'

ga.e vo din ki zamāna thā ḳhvāb-e-ġhaflat meñ

KHabar nahin ki abhi aur kya hai qismat mein

sanbhal gaya hun jo gir ke rah-e-mohabbat mein

shikayat-e-sitam-e-narawa ke ba'd na puchh

unhen bhi dekh liya aalam-e-nadamat mein

umid tujh se bhi TuTi to kya hua ai dost

meri to yun hi guzarti hai yas-o-hasrat mein

chubha jo panw mein kanTa to sair bhul gaya

baDe tapak se aaya tha bagh-e-ulfat mein

yahin pe KHatm nahin silsila jafaon ka

abhi to aur sitam sahne hain mohabbat mein

labon pe aah KHalish dil mein aankh mein aansu

kis ehtimam se jina paDa mohabbat mein

ab ehtiyat se is gul ki baat kar 'nazim'

gae wo din ki zamana tha KHwab-e-ghaflat mein