KHabar pahunchi unhen bhi kab bahaar-e-hashr-saman ki

ḳhabar pahuñchī unheñ bhī kab bahār-e-hashr-sāmāñ kī

fazā meñ dhajjiyāñ jab uḌ chukīñ jaib-o-garebāñ kī

unheñ uljhā diyā kitnā kisī ke dast-e-vahshat ne

pareshānī pata detī hai ye zulf-e-pareshāñ kī

vo husn-e-āfat-e-dīñ ab na.ī saj-dhaj se niklā hai

ilāhī ḳhair taqvā kī ilāhī ḳhair īmāñ kī

na pahuñchā un ke dāman tak to mil jā.egā miTTī meñ

ilāhī aabrū rakh le sarishk-e-chashm-e-giryāñ kī

mazāq-e-narm ho kuchh bhī use apnī hī dhun pyārī

bhalā is daur meñ kyā qadr ho aise ġhazal-ḳhvāñ kī

ulajhte haiñ agar kāñTe to 'ārif' tum ulajhne do

junūñ meñ fikr hī kyoñ ho qabā ke jeb-o-dāmāñ kī

KHabar pahunchi unhen bhi kab bahaar-e-hashr-saman ki

faza mein dhajjiyan jab uD chukin jaib-o-gareban ki

unhen uljha diya kitna kisi ke dast-e-wahshat ne

pareshani pata deti hai ye zulf-e-pareshan ki

wo husn-e-afat-e-din ab nai saj-dhaj se nikla hai

ilahi KHair taqwa ki ilahi KHair iman ki

na pahuncha un ke daman tak to mil jaega miTTi mein

ilahi aabru rakh le sarishk-e-chashm-e-giryan ki

mazaq-e-narm ho kuchh bhi use apni hi dhun pyari

bhala is daur mein kya qadr ho aise ghazal-KHwan ki

ulajhte hain agar kanTe to 'arif' tum ulajhne do

junun mein fikr hi kyon ho qaba ke jeb-o-daman ki