خبر سنتے تو ہیں اس سنگ دل کے دل میں آنے کی

خبر سنتے تو ہیں اس سنگ دل کے دل میں آنے کی

خدا معلوم کیا صورت بنے آئینہ خانے کی

نہ جانے خاک ہو جانے کی لذت کب میسر ہو

ابھی تو ایک مدت سے ہے خدمت خاک اڑانے کی

زمین و آسماں کچھ ہوں تو ہو پستی بلندی بھی

یہاں تو روز کیفیت بدلتی ہے زمانے کی

سہارا عشق زور آور نے خود ہی دے دیا ورنہ

کہاں ہم اور کہاں طاقت یہ کوہ غم اٹھانے کی

فنا آہنگ شاید ساز ہستی سے بر آمد ہو

کہ آتی ہے صدا تار نفس سے جھنجھنانے کی