KHabar un ko na ho kuchh bhi hamein taskin bhi mil jae

ḳhabar un ko na ho kuchh bhī hameñ taskīñ bhī mil jaa.e

sabā ai kaash un kī zulf se nik.hat churā laa.e

kisī ko to mile tāza-o-tar phūloñ ke gul-daste

magar ham ne to murjhā.e hue gul bhī nahīñ paa.e

hamīñ tishna rahe mai-ḳhāna-e-hastī meñ ai saaqī

janāb-e-shaiḳh ne masjid meñ sāġhar ḳhuub chhalkā.e

farozāñ hai matā-e-ārzū jis ke ḳhayāloñ se

tasavvur meñ haiñ us zohra-jabīñ ke ḳhush-numā saa.e

mohabbat rang laatī hī rahī bāġh-e-tamannā meñ

chaman meñ jis kalī ko ham ne dekhā aap yaad aa.e

guzar jā.ūñgā duniyā se 'razā' maiñ be-niyāzāna

kise mālūm hai tum tak na aa.e yā ḳhabar aa.e

KHabar un ko na ho kuchh bhi hamein taskin bhi mil jae

saba ai kash un ki zulf se nikhat chura lae

kisi ko to mile taza-o-tar phulon ke gul-daste

magar hum ne to murjhae hue gul bhi nahin pae

hamin tishna rahe mai-KHana-e-hasti mein ai saqi

janab-e-shaiKH ne masjid mein saghar KHub chhalkae

farozan hai mata-e-arzu jis ke KHayalon se

tasawwur mein hain us zohra-jabin ke KHush-numa sae

mohabbat rang lati hi rahi bagh-e-tamanna mein

chaman mein jis kali ko hum ne dekha aap yaad aae

guzar jaunga duniya se 'raza' main be-niyazana

kise malum hai tum tak na aae ya KHabar aae