khaDa hun dhup mein sae ki justuju bhi nahin

khaḌā huuñ dhuup meñ saa.e kī justujū bhī nahīñ

ye kyā sitam hai ki ab terī aarzū bhī nahīñ

mujhe to aaj bhī tujh par yaqīn hai lekin

tire dayār meñ insāñ kī aabrū bhī nahīñ

abhī to mai-kada vīrāñ dikhā.ī detā hai

abhī to vajd meñ paimāna-o-subū bhī nahīñ

tirī nigāh meñ chāhat kahāñ talāsh karūñ

tirī sarisht meñ shāyad vafā kī ḳhū bhī nahīñ

bas ik ta.alluq-e-ḳhātir kā paas hai varna

to ḳhūb-rū sahī par itnā ḳhūb-rū bhī nahīñ

chamak uThe na tire ruḳh pe dāġh-e-rusvā.ī

ye chaak vo hai ki sharminda-e-rafū bhī nahīñ

yaqīn jaan ki terā vajūd hai mujh se

ye maan le ki agar maiñ nahīñ to tū bhī nahīñ

khaDa hun dhup mein sae ki justuju bhi nahin

ye kya sitam hai ki ab teri aarzu bhi nahin

mujhe to aaj bhi tujh par yaqin hai lekin

tere dayar mein insan ki aabru bhi nahin

abhi to mai-kada viran dikhai deta hai

abhi to wajd mein paimana-o-subu bhi nahin

teri nigah mein chahat kahan talash karun

teri sarisht mein shayad wafa ki KHu bhi nahin

bas ek talluq-e-KHatir ka pas hai warna

to KHub-ru sahi par itna KHub-ru bhi nahin

chamak uThe na tere ruKH pe dagh-e-ruswai

ye chaak wo hai ki sharminda-e-rafu bhi nahin

yaqin jaan ki tera wajud hai mujh se

ye man le ki agar main nahin to tu bhi nahin