khaDe hue hain azizan alag tabib alag

khaḌe hue haiñ azīzāñ alag tabīb alag

ki hone vaale haiñ ham sab se anqarīb alag

sutūn-e-dār kī mānind jism baḌhte ga.e

badan se ho hī na paa.ī kabhī salīb alag

gulāb ham se alāhida hai aur bahut chup hai

ḳhamoshī baiThī hai gulshan meñ andalīb alag

alag alag koī tanhā.ī baañT jaatā hai

koī bichhaḌ ke alag hai koī qarīb alag

jame hue haiñ ki paañv ukhāḌ deñ mere

ye be-adab mire afsar alag adiib alag

'farīdī' ruuTh ga.e haiñ hamāre sab shab-o-roz

hameñ satāte haiñ dushman alag habīb alag

khaDe hue hain azizan alag tabib alag

ki hone wale hain hum sab se anqarib alag

sutun-e-dar ki manind jism baDhte gae

badan se ho hi na pai kabhi salib alag

gulab hum se alahida hai aur bahut chup hai

KHamoshi baiThi hai gulshan mein andalib alag

alag alag koi tanhai banT jata hai

koi bichhaD ke alag hai koi qarib alag

jame hue hain ki panw ukhaD den mere

ye be-adab mere afsar alag adib alag

'faridi' ruTh gae hain hamare sab shab-o-roz

hamein satate hain dushman alag habib alag