KHafa sayyaad barham baghban malum hota hai

ḳhafā sayyād barham bāġhbāñ ma.alūm hotā hai

bahut jald ab to chhuTte gulistāñ ma.alūm hotā hai

sharīk-e-ranj-o-ġham dard-e-nihāñ ma.alūm hotā hai

mohabbat meñ yahī rāhat-rasāñ ma.alūm hotā hai

koī mehr-o-vafā kā naam tak bhī ab nahīñ letā

ajab badlā huā rang-e-jahāñ ma.alūm hotā hai

maze meñ umr kaTtī hai koī shar hai na fitna hai

hameñ to mai-kada dār-ul-amāñ ma.alūm hotā hai

tamanna hasrat-o-armān jaise ho ga.e ruḳhsat

dil-e-nākām ik vīrāñ makāñ ma.alūm hotā hai

kaleja khiñch ke aa jā.egā ik din dekhnā bāhar

yahī anjām-e-fariyād-o-fuġhāñ ma.alūm hotā hai

samajh meñ kuchh nahīñ aatā hai kyā mafhūm hai is kā

muamma ek qāsid kā bayāñ ma.alūm hotā hai

muhayyā kaise kaise aish ke ishrat ke sāmāñ haiñ

ye mai-ḳhāna to ab jannat-nishāñ ma.alūm hotā hai

kahāñ kā vāsta rasm-e-mohabbat dostī kaisī

hamārā zikr tak un ko girāñ ma.alūm hotā hai

tumhārī hazrat-e-vā.iz dil-āzārī na jā.egī

ye zohd-o-ittiqā sab rā.egāñ ma.alūm hotā hai

asar ulTā hī hotā hai har ik tadbīr-o-darmāñ kā

har ik zarra yahāñ īzā-rasāñ ma.alūm hotā hai

qarīna to batātā hai yahī hai kūcha-e-qātil

har ik zarra yahāñ īzā-rasāñ ma.alūm hotā hai

mohabbat meñ hazāroñ marhale dushvār jhele haiñ

hameñ ik khel jaur-e-āsmāñ ma.alūm hotā hai

huī hai kyā ināyat barq kī mere nasheman par

chaman se aaj kuchh uThtā dhuāñ ma.alūm hotā hai

kabhī bhūle se ab dil meñ tasavvur tak nahīñ aatā

ḳhayāl un kā bhī mujh se bad-gumāñ ma.alūm hotā hai

asīrī meñ chaman kī yaad se taskīn hotī hai

tasavvur meñ qafas bhī gulsitāñ ma.alūm hotā hai

sahe ranj-o-alam itne tabī.at ho ga.ī ḳhūgar

hameñ ab ġham nishāt-e-jāvedāñ ma.alūm hotā hai

patā to aur kuchh miltā nahīñ hai dil kā pahlū meñ

magar haañ ek dhuñdlā sā nishāñ ma.alūm hotā hai

ḳhayāl-e-ḳhām hai ai dil natīja kuchh na niklegā

visāl-e-yār ik vahm-o-gumāñ ma.alūm hotā hai

ḳhudā hī laaj rakkhe aabrū rah jaa.e ulfat meñ

bahut hī saḳht ham ko imtihāñ ma.alūm hotā hai

ġham-e-jānāñ ne aa kar dil pe qabza kar liyā apnā

bahut hī be-takalluf mehmāñ ma.alūm hotā hai

ḳhudā jaane javāb-e-ḳhat meñ kyā likh kar ke aaya hai

ba-zāhir nāma-bar to shādmāñ ma.alūm hotā hai

tarīq-e-ishq meñ sab diqqateñ dil kī badaulat haiñ

yahī is raah meñ sang-e-girāñ ma.alūm hotā hai

ye sabr-o-zabt ye himmat dil-e-mahjūr kyā kahnā

musībat meñ bhī har dam shādmāñ ma.alūm hotā hai

bharosā kis pe ho 'ishrat' shikāyat ham kareñ kis kī

hameñ dil bhī sharīk-e-dushmanāñ ma.alūm hotā hai

KHafa sayyaad barham baghban malum hota hai

bahut jald ab to chhuTte gulistan malum hota hai

sharik-e-ranj-o-gham dard-e-nihan malum hota hai

mohabbat mein yahi rahat-rasan malum hota hai

koi mehr-o-wafa ka nam tak bhi ab nahin leta

ajab badla hua rang-e-jahan malum hota hai

maze mein umr kaTti hai koi shar hai na fitna hai

hamein to mai-kada dar-ul-aman malum hota hai

tamanna hasrat-o-arman jaise ho gae ruKHsat

dil-e-nakaam ek viran makan malum hota hai

kaleja khinch ke aa jaega ek din dekhna bahar

yahi anjam-e-fariyaad-o-fughan malum hota hai

samajh mein kuchh nahin aata hai kya mafhum hai is ka

muamma ek qasid ka bayan malum hota hai

muhayya kaise kaise aish ke ishrat ke saman hain

ye mai-KHana to ab jannat-nishan malum hota hai

kahan ka wasta rasm-e-mohabbat dosti kaisi

hamara zikr tak un ko giran malum hota hai

tumhaari hazrat-e-waiz dil-azari na jaegi

ye zohd-o-ittiqa sab raegan malum hota hai

asar ulTa hi hota hai har ek tadbir-o-darman ka

har ek zarra yahan iza-rasan malum hota hai

qarina to batata hai yahi hai kucha-e-qatil

har ek zarra yahan iza-rasan malum hota hai

mohabbat mein hazaron marhale dushwar jhele hain

hamein ek khel jaur-e-asman malum hota hai

hui hai kya inayat barq ki mere nasheman par

chaman se aaj kuchh uThta dhuan malum hota hai

kabhi bhule se ab dil mein tasawwur tak nahin aata

KHayal un ka bhi mujh se bad-guman malum hota hai

asiri mein chaman ki yaad se taskin hoti hai

tasawwur mein qafas bhi gulsitan malum hota hai

sahe ranj-o-alam itne tabiat ho gai KHugar

hamein ab gham nishat-e-jawedan malum hota hai

pata to aur kuchh milta nahin hai dil ka pahlu mein

magar han ek dhundla sa nishan malum hota hai

KHayal-e-KHam hai ai dil natija kuchh na niklega

visal-e-yar ek wahm-o-guman malum hota hai

KHuda hi laj rakkhe aabru rah jae ulfat mein

bahut hi saKHt hum ko imtihan malum hota hai

gham-e-jaanan ne aa kar dil pe qabza kar liya apna

bahut hi be-takalluf mehman malum hota hai

KHuda jaane jawab-e-KHat mein kya likh kar ke aaya hai

ba-zahir nama-bar to shadman malum hota hai

tariq-e-ishq mein sab diqqaten dil ki badaulat hain

yahi is rah mein sang-e-giran malum hota hai

ye sabr-o-zabt ye himmat dil-e-mahjur kya kahna

musibat mein bhi har dam shadman malum hota hai

bharosa kis pe ho 'ishrat' shikayat hum karen kis ki

hamein dil bhi sharik-e-dushmanan malum hota hai