خفا صیاد و گلچیں اور مخالف باغباں ہم سے

خفا صیاد و گلچیں اور مخالف باغباں ہم سے

چھٹے گا اک نہ اک دن یہ چمن یہ آشیاں ہم سے

چھڑایا کس طرح سے باغباں نے آشیاں ہم سے

الٰہی کوئی سن لیتا ہماری داستاں ہم سے

بیاں کیا خاک ہو صیاد حال گلستاں ہم سے

رہا آباد ہی کے دن ہمارا آشیاں ہم سے

کلیجہ اپنا اپنا تھام لیں احباب محفل میں

اگر سننے کو بیٹھے ہیں ہماری داستاں ہم سے

خموشی میں کہی جس طرح لوح قبر نے واصفؔ

بیاں اس لطف سے ہوتی نہ اپنی داستاں ہم سے

انہیں کیا علم تھا افسانۂ درد و الم ہوگا

بہت پچھتائے وہ سن کر ہماری داستاں ہم سے

رہی مہر دہن فکر معیشت عمر بھر واصفؔ

وگرنہ کم نکلتے دہر میں جادو بیاں ہم سے