خیر خواہی سے مری جان چھڑا دے کوئی

خیر خواہی سے مری جان چھڑا دے کوئی

اس تباہی سے مری جان چھڑا دے کوئی

لوگ جذبات کو بھی شعر سمجھ لیتے ہیں

واہ واہی سے مری جان چھڑا دے کوئی

بد نگاہی سے ہے ملبوس محافظ میرا

اس سپاہی سے میری جان چھڑا دے کوئی

میری تحریر کی تنقید گوارا کر لے

یا سیاہی سے مری جان چھڑا دے کوئی

حسن یوسف کی گرفتار زلیخا بولی

بادشاہی سے مری جان چھڑا دے کوئی

جلد سے جلد مرے حق میں سزا لکھ ڈالے

بے گناہی سے مری جان چھڑا دے کوئی

مجھ کو یک طرفہ تعلق نہ ڈبو دے شازیؔ

میرے ماہی سے مری جان چھڑا دے کوئی