KHair se farz kuchh ada to ho

ḳhair se farz kuchh adā to ho

jis se raazī tirā ḳhudā to ho

abr-e-rahmat ko josh aa jaa.e

lab pe aisī koī duā to ho

rū-ba-rū hogī ḳhud-baḳhud manzil

gāmzan koī qāfila to ho

chhū to lūñgā bulandiyoñ ko magar

dil meñ pur-josh valvala to ho

dard se āshnā hue to kyā

dard se dil bhī āshnā to ho

ham to taslīm kar hī leñ lekin

haq-ba-jānib vo faisla to ho

zabt-e-ġham ke hī vāste ai 'navāz'

koī bharpūr qahqaha to ho

KHair se farz kuchh ada to ho

jis se raazi tera KHuda to ho

abr-e-rahmat ko josh aa jae

lab pe aisi koi dua to ho

ru-ba-ru hogi KHud-baKHud manzil

gamzan koi qafila to ho

chhu to lunga bulandiyon ko magar

dil mein pur-josh walwala to ho

dard se aashna hue to kya

dard se dil bhi aashna to ho

hum to taslim kar hi len lekin

haq-ba-jaanib wo faisla to ho

zabt-e-gham ke hi waste ai 'nawaz'

koi bharpur qahqaha to ho